羅文否認逐張燊悦出師門　常提點做人道理解心結

羅文、梅艷芳、葉麗儀、陳潔靈、顧媚、張德蘭昨一起為「顧嘉煇黃霑真友情演唱會」綵排。昨日所見，羅記身形較以往健碩，他說：「每個星期玩五日健身，每次玩兩個半小時，成個人都健康精神咗。」

早前有傳他將學生張燊悦逐出師門，但羅記否認有這回事：「佢跟咗我幾個月，大家溝通有啲問題，加上撞正嗰時我又忙，佢又考緊律師課程，咪話遲啲先再傾學唱歌囉。」

羅記指張燊悦經常找他傾偈，訴說入行後遇到的是非不快，他亦有給對方意見：

「我都有話過佢啲衣着，佢有氣質有學歷，根本毋須着嗰啲性感衫，又同佢研究過佢對放電嘅『斗零眼』，佢話一對閃光燈就控制唔到，我咪教佢多啲練習囉。」

羅記教導新人最基本有三件事要注意：一要守時，二要有禮貌，三要充實自己。

他笑說：「有啲學生當正我係心理醫生咁，經常搵我傾偈，真係要訂張靚床俾人瞓，然後逐個收錢。」另外，羅記透露最近多間唱片公司斟他出唱片，他要視乎邊間公司開出的元素能引誘他，他才決定，下周應有公布。